(Prinsipal Lettie Festin Magango)
Ma. Crozalle Reyes Raymundo
a.k.a. Wee-ween Reyes, 10/12/2011
Bug-os it Odiongan inggwa it "Wonderwoman"
Si Lettie Magango kag ida pangayan
Sida ay naglibor sa baryo'g muyatan
Kag mga sitwasyon't ida kababayan
Inuna it bulig kaling mga tawo
Ida kasimanwang nabado it bagyo
Naghalin sa bayay ingbadaan kato
Nagyusong sa baha sa inra mapagto
Bulig it panao it baro sa tawo
inggwa it sadinas ag nodols pa kuno
Inggwa rat tinapay ingpanagtag ruto
Pati mga tamong nagtao sa tawo
Madam prinsipal hinayhinay baga
Uyan ay makusog rahan sa disgrasya
Isag ay mapalir ikaw ay rumapa
Mahirap yumusong mataas ka baha
Sigi ra ka puyot it mga basura
Maanor ra kina baling maraya ka
Basa kinang baro nahuom sa baha
Siguradong basa kuno pati kina
Aba'y pagkahugor kali nak maguyang
Indi ra masaway sabat puro "badyang"
Imaw kinat siling pag imo hinarang
Matutom magbulig kung riin ibutang
Tama yang tawagon sidang "Wonderwoman"
Ag sa kalamidad matulin magtuman
Pirdi pa ka bata nak patay-patayan
Matulin magpanaw pay ra di yaguran
Hala ma'am inggwat yubo raha sa rayan.....
No comments:
Post a Comment