MALE'Y MABAYLE KITA

MALE'Y MABAYLE KITA
Inspirasyon: Sonny Fabula's
Kag Ako Una Ag Huling Bayle
Ma. Crozalle Reyes Raymundo
a.k.a. Wee-ween Reyes, 01/04/2012

Tagana 7-7-7-7

Asi ra kaling bayle
Sa iba'y pagkabale
Kag kayaki'y nangisli
pay inakitik ka tuyi (nio kali?)

Asi gani leng bayle
Raguso ka kayaki
Agawan sa kabade
Pay tinra sa palengke

Asi ra kaling bayle
Pag tugtog ni Tang Mingue
Pay watusi sa kalye
Nayukso yukso kii

Pag tugtog it "Release Me"
Yagadaw kinang siki
Pay suya nak de sili
Yaswa ka mga kiki

Intro pa it sonata
Imo sinra makita
Naraguso sa tunga
kag bitbit ay maganda

Kaluoy ka rayaga
Bawal magpili baga
Mahangit pa sa ida
Pag lumiong liong pa

Miski pa ngani yango
Miski kaaway nimo
Miski piang pa kato
Miski ya napanglimpyo

Rayaga'y obligado
Tuna sa osang tawo
tanan ya pili kato
Abaylihan ra nimo

Asi gani magbayle
Pay rinaya sa ere
Nayawhaw ka sarili
Pay oning nak umire

Kag bayle pagkabale
Pag ing nobyo ra pirmi
Sa ida yang mabayle
Miski pa kada gab-i

Maado ra magbayle
Pag amigo ra kii
maghayakhaka'y bale
Di kaomer nak siete

Pero pay kasasapot
Kung kamahudothudot
Ay osa yang asungot
Aba ay kauugot

Tong buhi ka ak Tatay
Napauli sa bayay
Pay sida'y inabitay
Pag nagbayle si nanay

Kung gusto ra magbayle
Maraya it kabade
Kaling mga kayaki
Sa baylihan ay pwerte

Pila arang rayaga
Kaling mabibiktima
Kusmuron kinang oda
Sa sunor mabalik ra

Sa baylihan masadya
Pag gusto ka pareha
Sa langit inaraya
Nahabyog sa musika

Kag rayaga'y mapisli
Asing di makapili
Kaling kayaki gani
Indi it mga pasi

Hala bayle sa tanan
Kag hip hop kainaman
Oya kalit huytanan
Miski pa magdamagan

Hala bira hala pa
Agor kita'y magsadya
Miski ya kapareha
Bayle kita sa tunga

Tama sonny fabula
Kinang imo istorya
Ak apalakpakan ka
Kainaman ka tema

Osang simpleng istorya
Marakong rayaraya
Sa rughan it rayaga
Oya nida na oma

PAGKALOOY RA!!!!!!!!!