AKO AY TUTULA PARA SA MADLA

AKO AY TUTULA PARA SA MADLA
Ruben Ferranco, 01/15/2012

Kung ako'y may talino
Ikararangal ko 'to
Sa kapwa'y ialay ko
Ito'y galing sa puso

Anhin ang kaalaman
Kung takot kang malaman
Pag-iimbot ang laan
Sa tao ay gahaman

Ikahon mo na lang yan
Itago sa karamihan
Sarilinin tuluyan
Wag magaya ninuman

Huwag mong ipalagay
Iyang galing mong taglay
Saan mo ba hinukay
Sa iba ring nag-alay

Kung ang iba'y matuto
Sa galing na sabi mo
Dapat ikarangal mo
At magsilbing maestro

Huwag mong sasaklawan
Iyang alam ni Juan
S'ya'y may katalinuhan
D'yos ang pinanggalingan

Ang tao'y may adhika
Wag isiping masama
Puso mo'y umunawa
Wag pigilan ang iba

Kung ikaw ay nangarap
At gusto mong malasap
Upang sa hinaharap
Buhay mo ay masarap

Iba'y may pangarap din
Ang mundo'y wag angkinin
Ibahagi, ihain
Imbot wag pairalin

Oh kaysarap damahin
Sa puso ay namnamin
Kabutiha'y linangin
Ang Diyos nakatingin

Huwag kang mapanghusga
Pabayaan ang iba
Sila di'y may biyaya
Hindi ka nag-iisa

Bakit ka matatakot
At puso'y magkutkot
Kagalingang sandakot
Ngayon lang pumalaot

Nahan ang kagalingan
At ang pinanggalingan
Nitong kinatakutan
Di ba ikaw may tangan?

Bakit nagsusumigaw
Lakas ng alingawngaw
Umabot at umapaw
Sa bundok ay naligaw

Pag-aari ang mundo?
Lahat sosoluhin mo?
Sumigaw kung totoo
Magdakdak sa fezbuk mo