Ma. Crozalle Reyes Raymundo
a.k.a. Wee-ween Reyes, 11/26/2011
(Haiku 6-5-6)
Butiki, butiki
parang umihi
ayon sa kisame
Sisilip-silip pa
mukhang nahiya
sa taong makita
At kakawagkawag
mukha ngang duwag
tumakbo ang kumag
Pagdating ng hapon
pagkakataon
gagawin ang layon
Siya ay bababa
hindi gagala
hahalik sa lupa
Sabi sa alamat
ewan kung tapat
kung kwento ay sapat
Araw-araw noon
tuwing orasyon
mag-ina'y tutugon
Ang anak mabait
at magkalapit
wala namang pait
babae'y nakita
umibig bigla
sobrang nabalisa
Akala'y maganda
isang dalaga
engkatada pala
Bakit itong anak
nasirang utak
ang ina'y initak
Ang puso ng nanay
kanyang binigay
sa babae alay
sinunod ang liyag
hindi nahabag
kasamaa'y hayag
Merong nangyari
ginawang butiki
ngayon ay nagsisi
bababa sa lupa
tawad at awa
ang hinahangad n'ya
tutuo ma't hindi
merong butiki
sa ating kisame
Ito raw ay gamot
sa hika'y sagot
ako'y napakamot
Ulan ay dadalaw
Pag nahulog daw
sa ulo humataw
tiyak may bisita
pag sya'y kumanta
sa pintuan banda
Kapag sa bintana
s'ya ay kumanta
may sulat ka pala
Butiki'y kakanta
gabit umaga
sa bahay tumira
At ang mahalaga
tulong sa madla
insekto'y nawala
Ngunit mag-ingat din
baka samain
May laglag sa kanin
Iyan ang butiki
minsan ay ngiti
minsan mapatili
S'ya ay aking "Boarder"
"now and forever"
kami ay "together"
No comments:
Post a Comment