Ma. Crozalle Reyes Raymundo
a.k.a. Wee-ween Reyes, 11/2/2011
Ang isang pamilya'y may tatay at nanay
Merong unang anak siya ang panganay
Mayroon ding bunso minsan ay pasaway
Iba'y walang anak tuloy rin ang buhay
Ang masasabi ko sa isang pamilya
Maihalintulad sa punong may bunga
Kailangan din n'ya na may mag-alaga
Parang mag-asawa nagmahalan sila
Itong isang puno dapat alagaan
At para mamunga s'ya ay pausukan
parang mag-asawa na merong lambingan
Ang pagmamahalan magbungang tuluyan
Kapag namulaklak kasunod ay galak
At magiging bunga ang isang bulaklak
Parang isang ina nagbuntis ng tiyak
Lumaki ang tiyan inere ang anak
Itong anghel nila ay nailuwal na
Ngayo'y nakabuo ng isang pamilya
Oh kay sarap pala ng may anak ka na
Puspos ng ligaya umaga'y may tuwa
Pagdating sa hapon ay may sasalubong
Inosenting ngiti may kasamang bulong
Kahit di mawari diwang nakakulong
Kaysarap pakinggan sa pagod ay tulong
Kami'y maglalaro puso ko'y may ngiti
At sa aking isip ako'y may nahabi
At dito sa labi agad namutawi
Kaysarap mangarap problema'y napawi
Ngunit may pamilya ang anak ay wala
Mayron namang iba may lolo at lola
Meron ding kaanak sila'ng umaruga
Ang pamilya'y nand'yan at handang magpala
May anak o wala hindi importante
Mahalin palagi kung sinong sa tabi
Pamilya'y mabuo kung mananatili
Pag-ibig sa kapwa huwag isantabi
Ang pagpapamilya ay pananagutan
May pagpahalaga sa nasasakupan
Oras ay importante sama-sama minsan
Kapag may problema ay maaasahan
'Wag ding kalimutan ang D'yos na nagpala
Pamilya'y turuang sa "Kanya'y" kumilala
Pagkat ang pamilya laging sama-sama
Kung ang Diyos Ama ay mas mahalaga
No comments:
Post a Comment