UNANG PASKO MAGMULA KAY ONDOY

UNANG PASKO MAGMULA KAY ONDOY
Ma. Crozalle Reyes Raymundo
a.k.a.Wee-ween Reyes, 11/04/2011

Puro kalungkutan aking nakikita
Hungkag na paligid aking nadarama
Hindi pa naalis ang amoy ng baha
Nagpapaalala nagdaang sakuna

Kay panglaw ng araw parang nagbabadya
Mga kalungkutan ang mata'y may luha
Ang takot ay nadyan laging nag-alala
Bakas ng kahapon sadyang narito pa

Si Ondoy dumating Setyembre nga noon
Ika bente seis nakadalwang taon
kaybilis ng araw sa nagdaang taon
Nasa aking diwa kaysamang kahapon

Oktubre nawala ang bahang nagwala
Iniwan ang lupang kanyang kinawawa
Mabaho ang putik sa mga kalsada
Ang kapaligiran puno ng basura

Ang buong paligid ay aming nilinis
Tinanggal ang amoy na nakakainis
Nobyembre'y narito bahay ay nagbihis
May bagong pintura nagmukhang makinis

Ay napakalungkot Pasko'y malapit na
Ako ay nag-isip paano sumaya
Ang bakas ni Ondoy ramdam na ramdam pa
Kaybigat ng loob ang puso'y naaba

Ako'y nagsimulang mag-ayos ng bahay
Lahat pinalitan ng pula na kulay
Ang mga kurtina lahat ay binagay
At biglang sumaya nawala ang lumbay

Nagkabit ng ilaw buong kabahayan
At pinuno ko pa hanggang sa labasan
Ngayon ang "Christmas Tree" ay tinayo naman
Nilagyan ng sabit kaygandang pagmasdan

Mga kapitbahay ay gumaya na rin
Ito kaya'y hudyat ng aking hangarin
Lumukso ang dugo puso at damdamin
Lahat ay natuwa labi'y may ngiti rin

Kaysayasaya na sa loob ng bahay
At masaya na rin mga kapitbahay
Pagkat kami ngayon ay nagbagong buhay
Si Ondoy nalimot kami'y napalagay

Ika-labing-anim at simbang gabi na
Lamig ng umaga kami ay nagtyaga
Hanggang sa matapos gumising ng kusa
Diyos ang pag-asa kumapit sa Kanya

Pagsapit ng Pasko kami ay lumabas
Binati ang lahat sa lungkot umiwas
Ang tawa'y taginting ang tuwa ay bakas
Ang buong paligid ligaya'y namalas

Kaydami ng handa kami'y nagbigayan
Pagkatapos noon kami'y nagyakapan
Kay lutong ng tawa aming halakhakan
Kay sigla ng lahat puro kasiyahan

Sa buhay ng tao kayraming bangungot
Pero hindi dapat na tayo'y matakot
Sapagkat ang buhay may kasamang lungkot
Dapat ay bumangon ginhawa ang dulot.

ANG PASKO AY PARA SA LAHAT

ANG PASKO AY PARA SA LAHAT
Ma. Crozalle Reyes Raymundo
a.k.a. Wee-ween Reyes, 11/26/2011

Sa araw ng pasko lahat ay may gayak
Ang mga kristyanong kahit buhay payak
May handang pagkain masarap na tiyak
At tandang ang Pasko'y may saya at galak

Dito nga sa amin kaysaya ng Pasko
Sa bisperas pa lang kami'y magkasalo
Magkakapitbahay ay nakakagulo
Maraming palaro't palitang regalo

Sa umaga pa lang ay merong palaro
At ang mga bata dito ay magtungo
May bunutan sila ng mga regalo
Lahat naman sila may grasyang masalo

At sa gabi naman ay sa matatanda
May handang pagkain mayron pang programa
Meron ngang sayawan at katuwaan pa
Lahat ay masaya lahat ay masigla

Maraming niluto kaysarap ng handa
Lahat ay kakain at libre sa madla
Pagkat itong Pasko masaya ang diwa
May pagmamahalan tayo'y samasama

Bago magsimula tayo ay magdasal
Kahit simpleng dasal tayo ay umusal
At magpasalamat sa grasyang dumatal
Tayo'y pinagpala tayo'y "Kanyang" mahal

May kunting inuman ang kalalakihan
Kahit ang babae'y nakikitagayan
Kaysaya ng lahat merong halakhakan
Sila'y magbiruan masarap pakinggan

Ito't tumugtog na'ng magandang musika
At ang mga tao pumunta sa gitna
Kay lutong ng tawa sumasayaw sila
Ang iba'y nanghila ng mga pareha

Iindak indak pa kay-inam pagmasdan
Bigay todong sayaw dahil kahiyaan
Pagdating sa gitna sila'y laban-laban
Patigasan ng mukha para may tawanan

Bago pa nagtapos lahat magbunutan
Para sa regalo galing sa samahan
Ang bawat miyembro tiyak mabibigyan
Maraming biyaya lahat masiyahan

At pag "alas dose" ay magbatian na
Lahat ay magyakap mag besobeso pa
At ang kasiyahan makita sa mukha
Lahat ay masaya sapagkat Pasko na!

Maligayang Pasko ang aking pagbati
Ating salubungin ng puno ng ngiti
ngayo'y kaarawan may gawa ng lahi
Tayo ay magsaya tayo ay magbunyi

BAGONG TAON AY NARITO NA

BAGONG TAON AY NARITO NA
Ma Crozalle R. Raymundo
a.k.a. Wee-ween Reyes, 12/2011

Ah, halina kayo't ating salubungin
Itong bagong taon sa puso'y tanggapin
Ang mga nagdaan ay ating limutin
Kung nakakasakit sa ating damdamin

Lahat tayong tao ay makasalanan
At lahat ay galing kay Eva at adan
Kaya tangantangan unang kasalanan
Ating ding namana sa kapanganakan

Tayo ay magbago iwasan ang gulo
Harapin ang ngayon magsising tutuo
Ang buhay ay hiram may taning ang tao
Matutong gumalang at magpakatao

Masdan yaong ulap sa langit nadikit
Ang sariwang hangin sa bayan nawaglit
Mga kalikasang kaysamang magalit
Iyan ay patunay mundo'y may pasakit

Ngunit manawari'y atin ding makita
Na sa mundong ito may ligaya't saya
Lalo't may pag-ibig kay gandang umaga
Ang ngiti sa labi kayhalihalina

Ako'y manikluhod sa inyong harapan
At makikiusap lahat magyakapan
Damhin ang pag-ibig at ating makamtan
Ang kapatawaran ng sansinukuban

Ngayo'y bagong taon tayo ay magsaya
Simulan ang taon ng bagong pag-asa
Itabi ang lungkot itago sa luma
At wag hahayaan sa bago'y sumama

Tayo ay magdasal sa Kanya'y umusal
Tayo'y pagpalain lahat ay magmahal
Tayo'y magpatawad ang galit matanggal
Itong bagong taon aya't dumaratal

Maligayang taon oh kay sarap sarap
Ibuka ang palad hayaang matanggap
Ang mga biyayang ating pinangarap
Ngayo'y abot kamay mata'y wag ikurap

MANIGONG BAGONG TAON SA LAHAT!!!!!!

HAPPY BIRTHDAY HESUKRISTO

HAPPY BIRTHDAY HESUKRISTO
Ma. Crozalle Reyes Raymundo
a.k.a. Weeween Reyes, 12/25/2011

Noong unang panahon
May anghel na umahon
Sabi ng Panginoon
Sa Nazareth naroon

Nagngangalang Maria
Isa siyang dalaga
Anghel ay don pumunta
S'ya'y may dalang balita

Nang makita na siya
Ang anghel nagsalita
"Bukod kang pinagpala"
At siya ay nabigla

Ang anghel nagpatuloy
"Wag matakot" tinukoy
Doon siya tumuloy
Pagkat s'ya'y may isaboy

Ang sabi kay Maria
Wag magulat' magtaka
Diyos ang nagpadala
Ng magandang balita

Magdala'y si Maria
Jesus ang pangalan N'ya
Anak na pinagpala
Ng ating Diyos Ama

Si Maria'y nagtaka
S'ya ay walang asawa
Ang anghel nagsalita
"Ang anak ay anak N'ya"

Si Joseph ang napili
Sa kanya'y kumandili
Nanggaling s'ya sa lahi
Dugong bughaw na lipi

S'ya'y isang karpentero
Napakabuting tao
Namulaklak daw ito
iyong kanyang bakulo

Pero minsa'y naglakbay
Magbabayad ang pakay
Buhis ay pinagtibay
Ang lahat ay magbigay

At s'ya ay napaanak
Ng wala namang tiyak
Sa lugar na kay payak
Ay doon "S'ya" inanak

Sa isa ngang sabsaban
Sa Bethlehem kung saan
Ay walang masilungan
Ang lahat ay punuan

Ngayon nga ay birthday "Nya"
Ito'y alay sa "Kanya"
Anak na pinagpala
At aking sinasamba

Ito ngayon ang Pasko
Salamat sa yo D'yos ko
Ako ay naging tao
At nabuhay sa mundo

HAPPY BIRTHDAY JESUS!!!!!
MALIGAYANG PASKO SA LAHAT.....

IKA-SIYAM NA ARAW NG SIMBANG GABI

IKA-SIYAM NA ARAW NG SIMBANG GABI
Ma. Crozalle Reyes Raymundo
a.k.a. Wee-ween Reyes, 12/24/2011

Heto na heto na nga
Katapusang araw na
Ako'y kay saya saya
Simbang gabi'y tapos na

Kahit aantok antok
Pilit walang himutok
Narinig ang tilaok
nabulabog na manok

Ngumiyaw pa ang pusa
Gumising na ng kusa
At baka may umunga
Magising na ang madla

Tumungo sa simbahan
Kaysaya't kainaman
Lubos ang kasiyahan
Pagkat ngayo'y ika s'yam

Idilat ng mabuti
Ang mata'y ipalaki
Ika'y pumiksi piksi
Tumayo lang palagi

Pagkatapos magsimba
nakita ang bibingka
Puto bongbong pa pala
may niyog na kasama

Oh kaysarap namnamin
Ang nais natupad din
Syam na araw tapusin
Mainam sa damdamin

Isa itong sakripisyo
Ipakita ng tao
Pagmamahal ay buo
Para kay Jesukristo

Bukas nga ay pasko na
Lahat ay maligaya
Mga bata'y masaya
Naghihintay na sila

Ah, Maligayang Pasko
Ang bating may pagsuyo
Pag-ibig galing puso
Ang alay ko sa inyo

MALIGAYANG PASKO PO SA LAHAT......

IKA-WALONG ARAW NG SIMBANG GABI

                                      

IKA-WALONG ARAW NG SIMBANG GABI

Pagkatapos ng bukas
Hahanap ng lumipas
Sa labi'y mabibigkas
Simbang gabi'y nagwakas

At hahanaphanapin
Paggising tatanungin
Ay kaylungkot isipin
Isang taong hintayin

Pagkatapos magsimba
Mabuti't naalala
Yaong bilin ni Rhea
Pagkasimba'y bilhan s'ya

Puto bongbong kay sarap
Si Rhea ang nangarap
Ako ang nagpasarap
At parang nasa ulap

May ginadgad na niyog
Oh kaysarap isahog
Ako'y napaindayog
At muntik ng mahulog

Mainit ang bibingka
At may itlog na pula
Mapapaso ang dila
Masarap sa umaga

kapatid na Rhea binilhan na kita ng puto bongbong at bibingka...ayan na sa taas...

IKA-PITONG ARAW NG SIMBANG GABI

IKA-PITONG ARAW NG SIMBANG GABI

Ma. Crozalle Reyes Raymundo

a.k.a. Weeween reyes, 12/22/2011

Kaysarap isipin parating ang Pasko

Dal'wang araw na lang bisperas na ito

Kahit inaantok aming siniguro

Kami'y matatapos ito'y sakripisyo

Minsan sa malapit kami nagsisimba

At kung minsan naman malayo layo na

Kaya lang kagabi ako ay ma-isa

Lumakad ng solo makumpleto sana

Pagdating nga namin marami ng tao

Pag 'yong kinumpara nabawasan ito

Pagkat ang iba ay agad sumuko

Hindi nakayanan sa antok natalo

Kayganda kumanta ng mga kantura

Parang boses anghel sa lupa'y bumaba

Gaya nitong pari boses ay maganda

Masayang magmisa lahat ay matawa

Ito ang problema ako'y antok pala

Muntik ng ngumanga anak ay handa na

Pasimpleng siniko ako ay nabigla

Naputol ang diwa at nanaginip na

Sana ay matapos itong simbang gabi

Ika-pito na nga sana ay magwagi

Kahit nga si father lahat ay binati

nagpalakpakan pa lahat napangiti

Sana nga'y matapos itong simbang gabi

Lahat ng pagpuyat meron namang silbi

At napakasarap makumpleto lagi

Minsan isang taon hindi lagilagi

Nabuo din ang tula kahit tukod na ang tuka....

  

IKA- ANIM NA ARAW NG SIMBANG GABI

IKA- ANIM NA ARAW NG SIMBANG GABI

Ma. Crozalle Reyes Raymundo

a.k.a. Wee-ween Reyes, 12/21/2011

Naiwan sa bahay, ako ay mag-isa

Hindi naman sanay wala ng nagawa

Nagsimba ng solo pagdating huli na

Ang sermon ni Father muling nagsimula

Kumanta ang pari pagkalakas pala

Wala na sa tono ang boses ay iba

Hindi mahinaan akala'y maganda

Nalunod ang tinig yaong manganganta

Simbahan ay puno sa labas tumayo

Ako ay may dala ang folding na silya

Hindi nakatulog mata'y nakabuka

Kayhaba ng sermon antok ay nawala

Paano antukin lahat napatawa

Ang boses ni Father humahalinghing pa

Para lang kabayo na kumakarera

Mukhang napagod na pang-anim na simba

At ang aking dasal ay naisturbo pa

May katabing bata malikot na sadya

Silya'y daladala paikot ikot pa

Panay ang salita lakas ng bunganga

Kasama'y sumunod panay ang saway n'ya

Ngunit di s'ya pansin at mukhang may tama

Sarili'y natanong dapat nga ba kaya

pwedeng simbang gabi bata'y daladala

Natapos ang simba lahat ay masaya

pagkat itong pari mukha pang komedya

Paglabas ng simbahan ako ay nauna

At baka masiksik ako'y lumakad na

Pasensya na nakalimutang gumawa ng tula kanina...

  

IKA-LIMANG ARAW NG SIMBANG GABI

IKA-LIMANG ARAW NG SIMBANG GABI
Ma. Crozalle Reyes Raymundo
a.k.a. Wee-ween Reyes, 12/20/2011

Hindi na natulog ng dahil sa fez buk
Punta sa simbahan wala na ang antok
Pagdating nga namin panay ang himutok
Wala ng upuan nagtiis sa sulok

saktung sakto pala umpisa ng misa
Ang boses ni Father ayo't namalat na
Sa kasesermon nya gabi at umaga
Boses ay nasira at lalong nawala

Ngunit kahit malat kami ay nagulat
Natapos ni father ang sermon sa lahat
Kayhaba ng sabi kami'y namulagat
Masarap namnamin ikaw ay mamulat

Ika-lima na nga ako ri'y humanga
Marami pang tao puyat di alintana
Tinanong ni Father kung lakas meron pa
Lahat ay natawa lahat ay masaya

Ako ay natuwa at mata ay luwa
Hindi nga inantok at bukas ang diwa
Di gaya kahapon at tulo laway pa
Parang isang manok tukod na ang tuka

Magpapasko na nga di na mapigilan
At ang mga bata tiyak mamuwalan
Maraming ihanda sa bawat tahanan
Luluto si Nanay lahat sasarapan


Pasensya na di makatula puyat hehehe.....

BAGONG PAG-ASA SA BAGONG TAON!

BAGONG PAG-ASA SA BAGONG TAON!

(TWEENTY TWELVE O DOS MIL DOSE)

Ma. Crozalle Reyes Raymundo

a.k.a. Wee-ween Reyes, 12/31/2011

Oh kaysayasaya ito't narito na

Sang dosenang tuwa't puno ng pag-asa

Lumukso't sumigaw ipadyak ang paa

Ating salubunging may galak at saya

Tayo ay magbago't galit ay iwaksi

Tanggapin ang taon ialis ang hapdi

Ng ating kahapong sa ati'y lumungi

Harapin ang bagong may tamis ang ngiti

Baguhin ang ugali't ang inggit alisin

Turuan ang puso ang budhi'y linisin

Ang buhay gagaan ang sa'yo'y tanggapin

Ang bigay ng Diyos ating pagpalain

Itong dos mil dose ang dala'y marami

Sang dosenang swerti kung sakasakali

Haluan ng tyaga tayo'y magpunyagi

Kaya nga't ang tao magsipag palagi

At sa pagsalubong nitong bagong taon

Tayo'y tumingala sa Kanya'y tumugon

At tayo'y umusal sandaling lumingon

Ating iiwanan ang nalumang taon

Ilang oras na lang at tao'y magpalit

Namnamin ang lahat iwan ang pasakit

HUmingang malalim ibuga ang galit

Dibdid ay gagaan ngumiti sa Langit

Salamat, salamat sa 'yo dos mil onse

Sana ay natuto may leksyong nauwi

At ngayon pagharap may ngiti sa labi

May baong pag-asa itong dos mil dose

Salamat Oh Diyos sa nagdaang taon

Maganda at pangit lahat ay may rason

Pagkat nananalig sa 'yo Panginoon

Kami'y naniniwala ikaw ang aahon

Tayo'y humalakhak tayo'y pumalakpak

Tayo'y nakaraos sa taong kay payak

At sa bagong taon tayo ay pumadyak

Tayo ay lumukso sahig ma'y mabitak

MANIGONG BAGONG TAON SA LAHAT

SALUBUNGIN ANG DOS MIL DOSE NG MAY TUWA AT GALAK!!!!

IKAAPAT NA ARAW NG SIMBANG GABI

IKAAPAT NA ARAW NG SIMBANG GABI

Ma. Crozalle Reyes Raymundo

a.k.a. Wee-ween Reyes, 12/19/2011

Kay agang nagising pagkat sisimba na

Ngayon ay pang -apat dapat ay magtyaga

Pumuntang simbahan ng maagaaga

Meron pang upuan sa aming natira

Oh kaysarap naman itong pakiramdam

Kahit inaantok walang pakialam

Pagkat aking nais sa 'yo'y ipaalam

Na ang simbang gabi ay napakainam

Kay agang nagising pagkat sisimba na

Ngayon ay pang -apat dapat ay magtyaga

Pumuntang simbahan ng maagaaga

Meron pang upuan sa aming natira

Pagdating nga namin ay halos puno na

Sa pang-apat pala marami ring sadya

Ang aking akala magaling sa una

Sana nga'y tapusin at makasiyam ka

Habang nagmimisa umubo'ng katabi

At aking narinig sumagot si pare

Ako'y napangiti pang sakritan't pari

Sila'y nagsagutan ubo'y rumipeke

Habang nagmimisa ako ay nagdasal

Sana ay basbasan itong aking usal

Silang nagagalit nawalan ng asal

Mapatawad sana ng Puong Maykapal

Ako ay hinila ng aking dalaga

Akala ay tulog ang mahal n'yang ina

Ako'y napatayo akala'y kakanta

At ang mga kamay aking ipinorma

Palad ay binuka at magugulatin

Akala'y kakanta nitong "Ama Namin"

Biglang ibinaba at baka mapansin

Baka pagtawanan ang inang antukin

At sa pagtyatyaga misa ay natapos

Ang sermon ni Father ay di ko natalos

Itong sobrang antok paa'y ikinilos

Pinapadyakpadyak upang makaraos

Mamaya dapat maagang matulog para di antukin.....

PANGATLONG ARAW NG SIMBANG GABI

PANGATLONG ARAW NG SIMBANG GABI

Ma. Crozalle Reyes Raymundo

a.k.a. Wee-ween Reyes, 12/18/2011

Haiku 4-9-4

aba, aba

pangatlong araw na nga pala

ay kay saya

akala ko

kukunti na ang mga tao

at pangatlo

abay mali

marami rin ang pumarini

nagmadali

kaya kami

maaga ngayon ay maswerte

nakadali

nakaupo

kung nahuli pa ay nakupo!

walang banko

ganun na nga

ngayong umaga'y umulan pa

ambon pala

nagmisa na

si father ayan at malat na

boses wala

hay salamat

maswerte nga mata ko'y mulat

ako'y gulat

kagabi nga

ang bunganga ko'y nakabuka

nakanganga

kaya wagi

ako'y nagdasal ng mabuti

nakangiti

sana, sana

simbang gabi ay mabuo na

ay maganda!

kayo diyan

aba'y inyo namang simulan

habol naman

puyat na nga

nagtyatyaga tuwing umaga

nagsisimba

mabuti pa

ito ay tapusin ko na

tutulog na

sana magsimba ka rin tingnan mo sila...

PANGALAWANG ARAW NG SIMBANG GABI

PANGALAWANG ARAW NG SIMBANG GABI

Ma. Crozalle Reyes Raymundo

a.k.a. Wee-ween Reyes, 12/17/2011

Umuulan-ulan ng ako'y magising

At ang aking ilong ay panay ang hatsing

Aking naaamoy ang pasko'y darating

At ang mahal natin ating makapiling

Pangalwang gabi na aking panindigan

Ang mabuo ito ay kaligayahan

Kahit ako'y antok aking lalabanan

Hanggang sa matapos larga sa simbahan

Pagdating nga doon akala'y maaga

Gusto ko'y umupo ubos na ang silya

Mabuti may isa sa tabi'y reserba

Inalok ng mama kanyang pinaraya

Sa pangal'wang araw maraming tao pa

Bukas kaya naman ilan ang matira

Habang tumatagal pakuntikunti na

At sa katapusan maraming sisimba

Ito na si Father umarangkada na

Pagkat inaantok ako'y napanganga

Kunyari'y sinagi anak na kasama

Ako ay nagulat bunganga'y sinara

Natapos ang misa lahat ay kaysaya

At sa labas naman may puto't bibingka

Kami ay bumili almusal't meryenda

Para maramdaman na Pasko na pala

Pag-uwi sa bahay ako'y nagtipa na

At ang karanasan aking iistorya

Habang kinakain ang putot bibingka

Katambal ng kape init sa sikmura

Bukas po simba tayo ulit ha.....

UNANG ARAW NG SIMBANG GABI

UNANG ARAW NG SIMBANG GABI

Ma. Crozalle Reyes Raymundo

a.k.a. Wee-ween Reyes, 12/16/2011

Tandang tanda ko pa noong ako'y bata

Itong simbang gabi ay alas dose pa

Kahit inaantok ako ay sasama

Doon sa upuan ako'y nakanganga

Ngunit sa pagtanda aking daladala

At ang nakagisnan tuloy sa pamilya

Gising ng maaga kahit puyat ka pa

Hahabol ng misa kami'y samasama

Ngunit bakit ano, ako'y nalilito

Umaga na ngayon simbang gabi ito

Hindi tulad dati iyan ay tutuo

Sino ang nagturo gabi ay nabago

Ngunit ano pa man ang kasasapitan

Oras ay mabago huwag kalimutan

Ang siyam na gabi ating pagtyagaan

At may endulhensya tayong makakamtan

Maagang gumising ang dalawang supling

At inalog-alog ako ay tumambling

Dali-daling tumayo ang mata'y naduling

Napuyat sa Face book kayo ang kapiling

Ngunit sa paggising biglang naalala

Usapan kagabi maaga't sisimba

Ngayon ay malinaw kami ay pupunta

Doon sa simbahan unang gabi pala

At ngayong umaga ay simbang gabi na

Kami'y dalidaling lumukso sa kama

At agad nagbihis baka mahuli pa

Marami ang tao pagkat ngayo'y una

Ngunit sa simbahan puno ang upuan

Kami'y nakatayo walang masandalan

Ngalog aking tuhod pagod naramdaman

Ngayon ay nadala bukas ay agahan

Kay sarap pakinggan si Father mainam

Sermon ay maganda aking ninanamnam

Kahit ako'y gutom at tyan kumakalam

Itong aking puso busog at mayaman

Sana'y maging siyam hanggang sa matapos

Ngayo'y una pa lang tayo ay kumilos

Ating isapuso upang makaraos

Unang simbang gabi simba ay malubos

Bukas simba ulit tayo ha.........

Mgandang umaga po!!!

EROPLANO PAG UNDAS

EROPLANO PAG UNDAS

Ma. Crozalle Reyes Raymundo

a.k.a. Wee-ween Reyes, 10/21/2011

Halina at sumakay

mamasyal at kumaway

sa buwang nakatunghay

Nasalubong ko siya

paroo't parito pa

mukha siyang abala

Talagang s'ya'y "in demmand"

ang serbis "at your command"

kahit pa ma "reprimand"

Hala sakay na kayo

libre para sa inyo

kahit saan tutungo

Ito ngayon ay promo

hanggang Nobyembre uno

aayaw pa ba kayo

Iyong sasakay dito

libreng pamasahe mo

sampung araw din ito

Mas matulin pa sa"Jet"

siya'y sumasagitsit

Kahit saan sumingit

Humawak lang ng todo

at wala rin 'yang kambyo

para s'yang ipu-ipo

Wala ring manipesto

walang bayad serbisyo

walang bayad lulukso

Panggabi ang byahe n'ya

at "expired" ang lesensya

tayo ay magpasensya

Oh sumakay na kayo

at lalarga na tayo

subukan magdiliryo

Tayo na mga kaibigan magbonding sa ere....hihihihi.....

MANGANGALULUWA PO...

MANGANGALULUWA PO...

(Araw ng Undas, Nobyembre 1, 2011) 

Ma. Crozalle Reyes Raymundo

a.k.a. Wee-ween Reyes, 10/12/2011

♪♪"Kaluluwa'y dumaratal♪♪

♪♪Sa tapat ng durungawan♪♪

♪♪Kampanilya'y tinatangtang♪♪

♪♪Ginigising ang may bahay♪♪

♪♪Kung kami po'y lilimusan♪♪

♪♪Dali-dali n'yo pong bigyan♪♪

♪♪At baka kami'y mapagsarhan♪♪

♪♪Ng pinto ng kalangitan♪♪

"Nay, nangaluluwa nariyan sa labas

Narinig ko silang kumantang matimyas

Bigyan natin Nanay di naman madalas

Tuwing isang taon sa araw ng Undas"

Tayo ng maglinis at bukas ay handa

Magdala ng walis, ng trapo at timba

Magdala ng sabon at puting pintura

Huwag kalimutan ang ating meryenda

Ngayo'y malinis na at trapal ay kinabit

May mga bulaklak sa gilid sinukbit

Nagpintura na rin mag-ingat madikit

At baka sa damit pintura'y kumapit

Araw na ng undas tayo ng pumunta

Handa na ang lahat bitbit isa-isa

Puto't dinuguan may "fried chicken pa"

Espageting masarap inumi'y handa na

May dalang bulaklak at kay halimuyak

Kadila'y may sindi anghel pumalakpak

Ngayo'y pyesta nila wala ng iiyak

Pagkaraming tao lahat ay gumayak

Dumating ang ibang mga kamag-anak

May suman na dala, kakanin, nilupak

Tayo ay magdasal mamaya'y papapak

Mga dalang baon tayo'y mapasabak

Oh magkainan na buksan ang pagkain

Habang nagkwentuhan dala ay papakin

Pagkaraming baon sobra pa sa atin

Bigyan mo ang iba para mabusog din

Ngayon ang kandila ayan natunaw na

Sa kamay ni Totoy kanyang kinamada

At hinimas-himas at naging bilog na

Mabangong kandila ngayon ay bola na

Araw ay natapos nagdasal ng masidhi

Kwentuha'y kay sarap lungkot ay napawi

Halakhaka'y sobra muntik mapaihi

kandila'y kunti na pwede ng umuwi

Madilim ang bahay ang ilaw puro patay

Inay may kaluluwa dito nyahhhh.....

  

KALULUWA BAY NAGLIPANA?

KALULUWA BAY NAGLIPANA?

Ma. Crozalle Reyes Raymundo

a.k.a. Wee-ween Reyes, 10/20/2011

Ng umalis si Undoy

nag-iwan ng panaghoy

kaluluwa'y natukoy

Sa itaas ng bahay

sa "roof top" tumatambay

mga gamit hinalukay

Pagkat gamit nabasa

maraming pang nasira

ng bagyong nanalasa

At habang nag-aayos

mga gamit kinuskos

ang tubig umaagos

Madilim no'n ang langit

panahon ay masungit

para bang nagngingitngit

Nagtatago ang buwan

nakakatakot tingnan

parang di makayanan

Maya-maya'y nagulat

mata'y napamulagat

lumuwa todo dilat

Sapagkat alas dose

muli ay hating gabi

lumabas mga duwinde

Ngunit duwinde kaya

o mga kaluluwa

dito ay naglipana

Pagkat maraming buhay

sa bagyo ay nawalay

kaluluwa'y namahay

Sila ay umiikot

kaluluwang natakot

kung saan mamaluktot

Di agad nakakilos

hininga ay kinapos

paa ay itinulos

Sapagkat sa paligid

hangin ay nagpabatid

at lamig inihatid

Mayrong hanging humampas

sa mukha'y pumalaspas

may ibong pumagaspas

Ang buhok ay tumirik

may alambreng pumitik

ang ulo ay nahindik

Ang katawa'y nanginig

parang di makatindig

heto't may nakatitig

Katawan ay nanigas

mukha'y di maitaas

ulirat tumatakas

Maya-maya'y nagdasal

Ama nami'y inusal

Ulit ulit ang dasal

Kanta ng Ave Maria

paulit-ulit siya

hanggang mag-ala una

Natapos ang pagdasal

abot Langit ang usal

narinig ng Maykapal

Unti-unting nawala

katawan ay kinapa

isip ay umunawa

Ngunit wala talaga

ang isip ang may sala

puro takot napala

Kung anong naranasan

ang Diyos may alam n'yan

di abot kaalaman

Magandang karanasan

Tayo ay magkwentuhan

sa undas maghuntahan

Undas ay nalalapit

pyesta nila'y sasapit

kaluluwa'y kandirit

Kayo ba'y may kwento rin sa araw ng kaluluwa?

 

ANGHEL SA LUPA

ANGHEL SA LUPA

Ma. Crozalle Reyes Raymundo

a.k.a.Wee-ween Reyes, 10/26/2011

Ngayong malapit na ang araw ng Pasko

May biglang gumuhit dito sa isip ko

May isang lalaki ngalan n'ya'y Juanito

S'ya'y may kapansanan ngunit makatao

Ta-juanits ang tawag na lambing sa kanya

At ang kanyang idad mahigit singkwenta

Kanyang kaisipan kung iyong makita

Parang limang taon bubulul-bulol pa

Noong isang taon ay aking nalaman

Istorya ng binata aking napakinggan

Ako ay nagulat aking hinangaan

Pagkat naiiba ako ay nabaghan

S'ya ay masayahin ika'y matutuwa

At marunong pa ngang maglaro ng sakla

Siya ay uupo baraha'y kinuha

Pero magagalit kung wala kang taya

Ngayon namang pasko s'ya ay naghahanda

Gumawang marakas ngayon ay bitbit na

Yon pala ay gamit sa kanyang pagkanta

Iikot mag-isa magkakaroling na

♪♪♫"ang asngo ay aapit aayo aawit"♫♪♪

Baka ka mapikon at saka magalit

Ngunit kung pakinggan ang kanyang inawit

Para palang boses nanggaling sa Langit

Merong kapansanan pero pilantropo

Ang kanyang kinita ay ipapamasko

Itong mga bata na kanyang katuto

Bibilhan ng laruan kendi't puto-seko

Pagsapit ng pasko ay may pumipila

Ang batang lansangan pupunta sa kanya

Pagkat alam nila s'ya'y may inihanda

Ang mga pamaskong galing sa kinita

S'ya ay maawain kahit isip-bata

Bakit di gayahin gawin din ng madla

Sa araw ng Pasko ay magkawanggawa

Tayo ay magbigay sa mga kawawa

S'ya'y napakasaya makita sa mukha

Ngingitingiti pa minsa'y tumatawa

Bakas ang ligaya at napakasaya

Itong batang-isip nagbigay ng tuwa

Kung iyong makita ika'y maaawa

Pagkat s'ya'y patpatin at hapis ang mukha

Kapag kinausap parang isang bata

Wala kang makuhang matinong salita

Pero ang tutuo ako'y di naawa

Siya ay mabuti at mahal ang kapwa

Ako'y sigurado ang D'yos ay matuwa

At doon sa Langit tiyak s'ya'y kasama

Mabuhay, mabuhay para kay Juanito

At para sa akin anghel kang tutuo

Mahal ng D'yos Ama ang gaya sa iyo

Ang anghel sa lupa ay ikaw Juanito