(Bagyo Ramon sa Odiongan)
Ma. Crozalle Reyes Raymundo
a.k.a. Wee-ween Reyes, 10/12/2011
Kidlat nakakagulat
kaylalim ngumangatngat
ang dibdib mawawarat
Hanging pumapagaspas
sobra namang lumakas
at kaybilis humampas
Dumagundong ang kulog
ginising ang natulog
kamuntik ng mahulog
Dumilim ang paligid
ang luha ay nangilid
sa pisngi ay tumawid
Ulan ay naghabulan
rumagasang tuluyan
ang bundok tinakbuhan
Pagkat ang ating bundok
walang natirang buhok
inubos ng dayukdok
'Di ba tayo kikibo
itong mga palalo
sila ay walang puso
Kailan ba tigilan
ang pagsira sa bayan
tao ang mapilayan
Bakit ba aming banwa
ay nalunod sa baha
ng bagyo ay lumala
Hindi mo ba nakita
ang baha naglipana
walang makitang lupa
Tanima'y naging dagat
walang kamukat-mukat
tubig ay sumambulat
dapat ka bang matuwa
at kami ay nasira
mukhang kaawa-awa
Gusto mo ba talaga
kami ay madapa na
at tuluyang tumumba
Ang bubong ay lumipad
bahay ay nakahubad
mukha pa bang mapalad
Ang kalsada'y nabitak
nagmukhang balong payak
nauka at nawakwak
Ikaw ba'y natutuwa
gutom ang mga bata
nanginig ang 'yong kapwa
Halina at magtanim
ang buhay di dumilim
Mukha'y wag kumulimlim
Tayo na at magdasal
at bagyo ay babagal
umalis ang sagabal
Ang ulan ay humupa
ang baha ay bumaba
ang basura'y nakita
Maglilinis na naman
tayo ay magkuskusan
buhay ay sadyang ganyan
No comments:
Post a Comment