ROMBLON, PROBINSYA'T MALIPAYON
(Kilay-on nato ka ato probinsya)
Ma. Crozalle Reyes Raymundo
a.k.a. Wee-ween Reyes, 8/4/2011
Aba, ako ay oya ey't ayam sa ako tinubuan
Kaling Romblon yaki ay pay tawong nag-anam
Ibang isla nak dati'y 'ya nato naistudyuhan
Naomer sa ato mapa pay mga haling nagrugang
"Dos Hermanas" nak isla imaw kina sinra
Carlota ag Isabel magmanghor nak maganda
Parti pa it Banton ato arumrumon ra
Sa ida habig sa irayom ay Bantoncillo nak isla
Pagbalikir ay Sibale ngasing Concepcion kina
Sa isla't Maestro de Ocampo sida ay makikita
Umis-rog sa Corcuera ay kag isla't Simara
Indi kita mayaag basta sunra yang ka mapa
Kag Cobrador ag Alad ag Logbon nak mga isla
Mga baranggay pa it Romblon, ako yang nabasa
Hali kag ato kapitolyo, marbol kag produkto nida
Pay "Ida" ra "obra maestra" kaling ato probinsya
Pagsalta sa Sibuyan tatlong banwa kag raya
Magdiwang ,San Fernando, ag Cajidiocan pa
Abang tayog nak bukir makikita riling isla
Kag "Mt. Guiting-guiting", abot ka rampog nida
Balik anay baga kita sa unahan it mapa
Ni-o kali arang nopay bumaliskar nak baka
Aba ay pagkarakong isla kali it at' probinsya
Tablas kag pangayan ato kilay-on kag mga banwa
Pasyar kita sa Sta. Maria kung tawagon ay Imelda
Sunor ay San Agustin pagliko'y carmen ag Calatrava
Inggwa't osang sapatos hali sa San Andres banda
Nabilin it higante sa kahadlok rumayagan sida
Hali'y kita sa Odiongan, pinakamarakong banwa
Pay Manila it Romblon paradaw sa ak' amiga
Ramong ragkong bayay, kumpleto pa kag ahensya
Ferrol nak ida dating baryo ngasing ay banwa'y ra
Hala deretso kita sa Looc kali kag masadya
Pag nahangit ka bagyo bapor ay natago sa ida
Pag-abot sa Sta Fe sa unahan ay Alcantara
Pag imo marungan ka eroplano, Tugdan sa una-una
Nalibor ey siguro nato kag buong probinsya
Pero ano kaling nagbibitin nak pagkaisot ra
Isla Carabao yaki kung sa hadop bang rako ka
Imaw kali kag San Jose tan-ay tama kita
Aba pagkahuhaba ra kaling ako nahimong tula
Nawili't kalilibor miski kapilay 'ya gi sawa
Hali kita nagsultero ag nagrayaga ag nagtanra
Nak kag ato "Romblon" maganda ag ato palangga
Note:
baliskar ka ngayan it ferrol ag Looc sa original nak mapa, pasensyay
*kag bisaya nak "Ida" sa ako tula ay patungkol
sa "Diyos" kada marakong letra kang inggamit
No comments:
Post a Comment