Sinulat ni Ma. Crozalle Reyes Raymundo
(a.k.a. Wee-ween Reyes, Aug. 26, 2011)
Bata, bata, bata saan nagsimula
Sa unang araw ba ikaw ay nakita
Mata'y nakapikit at mukhang kawawa
Labi mong kaynipis bunganga'y bumuka
Bata, bata, bata bigay ni Bathala
Pag ika'y nakita inis nawawala
Tamis ng 'yong ngiti pagod ay nawala
Sa kahinaan mo akong aalaga
Bata, bata, bata saan ka nagmula
Nililok ka gamit ang pag-ibig nila
Hinubog kagaya ng isang kandila
Upang sa paglaki mabait na bata
Bata, bata, bata kahit di maligo
Samyuin ng ilong ikaw ay mabango
Ang amoy ng sanggol oh kay sarap mo
Sisinghot-singhutin habang kayakap ko
Damhin ang pag-ibig habang nakakanlong
Sapagkat paglaki'y halos di makalong
At sa iyong bigat karga'y urong-sulong
Habang sinasayaw ako'y bumubulong
Halina nga sanggol habang ika'y kaya
Bukas makalawa'y lalaki't tatanda
Panaho'y lilipas/ magkarga'y sasawa
Lalaki ka sanggol/ ika'y di na bata
At sa 'yong paglaki ako'y susubaybay
Sa lahat ng oras andito at gabay
Hanggang sa kayanin katawa'y matibay
hanggang sa paglaki patuloy sumikhay
No comments:
Post a Comment