MR. KUPIDO

MR. KUPIDO

Ma, Crozalle Reyes Raymundo

a.k.a. Wee-ween Reyes, 2/14/2012

Kaygandang pangalan sa iyo'y nilaan

Tagapana ka ba para magmahalan?

Pag-ibig nga kaya'y iyong kagagawan?

O tumubong kusa sila'y nag-ibigan

Kung ika'y papana iyo ngang tiyakin

Sa gitna ng puso doon mo tudlain

Ng dalawang tao sumpaa'y tuparin

Upang hanggang wakas magkasama pa rin

Kaysarap umibig balahibo'y titindig

Sa puso'y kumapit may dala pang kilig

Kung sa ilong naman nagsilbing tigidig

At ang pagmamahal ang laging dinilig

Sana araw-araw ika'y maging tanglaw

N'yaring mga puso na sadyang galawgaw

Biglang magsasawa paa'y maliligaw

At sa ibang bahay doon na dumalaw

Bakit ba nauso itong palikero

Kaygaling ng dila ng mga bolero

Kung makapatyarming ang mga bohemyo

Babae'y hahabol sa mga gigolo

Sana'y di nauso itong babaero

At ang kaliwete sana ay magbago

Pag-ibig ialay ng wagas ang puso

Magmahal ng tunay lalaki'y tumino

Pero ang totoo may iba ring kwento

Hindi lang lalaki ang nagkaganito

Meron sa kanila na wasak ang puso

Pagkat may babaeng sadyang lalakero

Kaysakit nga yata kung ito'y mangyari

Pagka't di matanggap ng mga lalaki

Mundo ay baliktad pag ito'y babae

Hindi tatanggapin sa lipuna'y api

Ngunit mas marami sa lalaki'y uso

Ang nagtalusira sa mga pangako

Pamilya'y iniwan limot ang pagsuyo

Pamilya'y iniwan buhay ay naliko

Sana nga Cupido ikaw ay totoo

Upang maiayos ang tao sa mundo

Sana ay mawala itong palekero

At ang palekera hindi rin mauso

Kaya ang pag-ibig ating idambana

Palaging isama ang ating D'yos Ama

Humingi ng gabay at buhay gumanda

At ng lumigaya't lahat ay masaya