SA PAG-INOG NG MUNDO

SA PAG-INOG NG MUNDO
(Mauulit ang mga tagpo)
Sagot sa tula ni Tata Raul Funilas
(Sa baba nitong aking tula)

Kundimang umaliw noong mga paslit
Tumatak sa isip wala ng hagikhik
nawili't natangay ng bagong daigdig
wala na ang galak, bagot na sa awit

Natapos na wari ang mga paggabay
Tanging inalayan lumaki't may aral
nagsubi't nag-ipon lumaking marangal
Ang yugto ng buhay naiba ang kulay

Nasaan ang awa kung isip ay manhid
Aral na tinuro tumibay ang katig
Kung init ng yakap ang sagot sa hibik
Uhaw sa paglingap ang luhang nasaid

Mukha may mahapis may aral na handog
Paglaki ng paslit may kasamang hambog
(at muli ang paslit,tatanda, hihinog)
(uulit ang tula, mundo ay iinog.)

Wines 2013 (Dis. 3)

Di Ko Naramdaman Ang Pagod Noong Pinalaki Ko Kayo
Raul Funilas

"Noong paslit ka pa'y laging inaawit,
Ang ilang kundimang tatak sa 'yong isip;
Libong kaaliwan ngiting may hagikhik
Ganyan ka inaliw ng galak ko't awit.

Ginabayan kita lahat ng panahon,
Ginawa ang kayang aking maitulong;
Laging may pangaral magsubi't mag-ipon
Upang sa pagtanda'y umupo't bumangon."

Sinunod ang aral ng mahal kong ama,
Nagsikap marangal sa hirap at pita;
Gumaod sa laot ng yutang sigwada
Naitaguyod kong may ngiti at tawa.

Ngunit nang tumanda ako'y nahahapis,
Naghahanap ako yakap N'yong malabis.

Photo credits to the owner