"BAGOT"
www.weenweenreyes.blogspot.com
Sa apat na sulok ng langit,
hinahanap ang sarili sa pag-iisa.
Kinakapa ang bawat pira-pirasong ulap
na nagtatakip sa mukha ng buwan,
habang ang bituin ay nagpupumilit,
sumisilip sa bawat siwang.
Ito ang nagsisilbing ilaw
sa mapagbalatkayong pusikit.
Samantalang ang mga buntunghininga'y
nagdudumali sa pagtakas.
Nakauumay ang tiktak ng bawat sandali,
Halos nakikipag-unahan sa naghuhulagpos
na liwanag. Ang tumutulong luha'y
tila agos na humahampas sa pagal na isip.
Naghihimutok sa nakabibinging
katahimikang nagsusumiksik sa kawalan.
Nagsisimula ng kumaway
ang bukang liwayway
kahit ang kumikindat kindat
na tala'y unti unting lumalayo,
papalayo ng papalayo
Dahan-dahang isinara ang bintanang
kanina lang ay nakabukas
Hanggang sa magsawa't sumuko
ang diwa't lumatag
hanggang sa kinabukasan
muling mababagot.
Terweena 2013 (Okt. 28)
Photo credits to the owner
No comments:
Post a Comment