Hinanap kang muli sa aking kahapon
binuklat bahagya ang bawat pahina
ang patak ng hikbi ang saksing naroon
anino mo'y oda ang syang kapara.
Sandali'y tumigil ang aking orasan
upang nang tanawin bumalik sa noon
hanggang sa marating ang dating tipanan
may kirot na munti sa maling paglingon.
Ngunit di man sadya na ikaw'y iwanan
hinuha ko'y dahil ito ay tadhana
sa aking hinagap wala mang dahilan
kung dapat maganap akibat ay luha.
Pagkat ang pag-ibig minsan may hiwaga,
hindi man naisin may dalang pagluksa.
Weeween Reyes 2019
No comments:
Post a Comment