Kung kulay puti na ating mga buhok
at ating memorya ay pipiyok-piyok
kahit ating tuhod ay uugod-ugod
at ang mga ngipin ay nangagsihulog.
Kahit mga kamay tuluyang manginig
at ating daliri sulat pumapangit
kapag ating likod sa gabi'y may lamig
kulubot mang kamay, hagod nati'y init.
Kahit tay'y hukot na at kukuba-kuba
Kahit kapos na rin ating pag-unawa
Kung sintunado na ang bawat kataga
hayaang ang puso ang magsasalita.
At sa dapithapon kamay mo't kamay ko
Magkadaop-palad, hawak mo'y hawak ko.
Weeween Reyes 2019
No comments:
Post a Comment