PABAYLE SA TANAN

"Pabayle sa Tanan!"
http://weenweenreyes.blogspot.com

Pabayle sa plasa, tugtog si Tang Mingui
soltero'g rayaga ilis rali-rali
naglipstik it puya, kilay ay ging puksi
palda nak miniskirt, sapatos nak puti.

Matulin it tikang karsada'y masapnot
isag kaling takong, ya malay nahuyog
isputing ra tan-a kaling mapanglusob
ugaling ka iba it tyang ra naos-os

Pasakalye payang narindi ka buli
raog pa ka oning indi mapakali
buslo kaling maslok pay ra mapaihi
rugos ka kayaki, kanya-kanyang pili.

Abang lasa gani ka mga sonata
yumang mga kanta ka sadaw ay chacha
todo ra't kuratsa miski ya pareha
na udag-udag pa ag.mag guya-guya.

Aruy bang buduboy pag tugtog ray it sweet
indi mapugungan raguso ka laskit
puno ka sadawan pay ra nasagitsit
hala bira, hala, miski magkaipit.

Tuyar sa ak banwa tong amo panahon
Miski de tsinelas ay apasadawon
ma ukaw ka emcee de hudot nak litson
"Kaling bayleng kali'y sa buhok nak kuyong".

Kuno ling ak hali pay ra mahud-anon
hagto kung kaosa siki'y katoy-katoy
rayahig it karat kaling osang mangor
ugaling sa tunga inabot it killjoy

Kaling nakabayle oya ra namasre
yangong ayayago nak natuturete
sadaw-sadaw sinra libor ka kayaki
galing pag atubang aosa'y ka pobre.

Nahadlok magbayle, tulin it pauli
namadla ka'k hali, oya'g uli-uli
ngasing ka kayaki maarte'y ra gani
isputing it kato, ngasing ay mapisli

"Kag tugtog nak kali ay sa nakaruyaw"
sursor sa kayudo nagbaoy it tuwang
pag sonata't bogi aba ay sagudar
ka bag-ong sapatos nak ida inutang.

Pabayle sa ato kali ay masadya
hanrumanon nato sa palanggang banwa
kaling kabataan, tanang kaguguya
Indi ey maulit mabungi man sinra.

Weeween Reyes 2019
Photo credits to the owner