SA AK PINALANGGANG ODIONGAN

Sa Ak pinalanggang Odiongan


Kayangkag rumrumon banwang ing rakuan

yaey bayay riling ako matanraan

rabunong maguyang pa'y matayang-tayang,

mayaag nak gador, kung ya't pangutan-an.


Ak napapahidom kung ako isipon

tong ako'y maisot hudlot pa ka sip-on

pagkasusadya ra ka mga idam-on

bayay-bayay, siklot, tagu-taguan pong.




Tong pusgo pa kita ka yawas makusog

yaguran sa kalye naliwas ka gaos

pag na-estoryahan raog ka rayugrog

pagnahayakhakan perte't uyok-uyok.




Tong maruragko ey nauso ka pingpong

hanggang sa magguyang natun-an ay mahjong

kada tong pingpong ag tagu-taguan pong

naging escalera, close kang, all up ag pong.




Aba'y durong hanra pag adlaw it pista

rugos ka bisita sosyal, manilenya

adobo sa gata, ginat-ang yangka pa

syempre'y naliwas ra ka ba-ong kutsara.




Kung kada lik banwa ay kapupalangga

magraya't bisita'y buko kahuhuda

kada hapon inggat lakong dila-dila

bitsokoy kutsinta, ingga pa't marhuda.




Yakaraw sa baybay pagsubo it adlaw

kasadaw ay adlaw pag napangagaykay

pay ra mapayuksong kagaykay yumuaw

pamupo"t alugbat ag higop it sabaw.




Nayaga't kamote, naihaw it batag

sawsaw sa pakasam pay ka mapaodag

de bundo'g apali, ag tulingang pangat

pay kag kalibutan pirmi ay mahadag.


Kada natingaya kaling mga apas

ka bawat masapoy "mano po" ka buhat

ka ako asawa nalipong it muyat

pay kuno artista bugno ra it puat.


Sa pagpoprogreso'y masadya ka tanan

nagtutubong bilding, jolibee'g kaunan

mga bag-ong bayay ag magandang rayan

kali ay patunay pag-uswag it lugar.


Ngasing pagpauli riling ato banwa

pagkadurong tawo sin-o ara sinra

buko t'yar it kato ka oda'y de guya

ka bawat masapo'y hali ag kilaya.


Galing pangutana riling mga laon

kung at papilion ay mapanagitlon

mantika ag toyo, bukayo ag kan-on

lamayo nak bislar, tambo nak inaslom.



Weeween Reyes 2019


Photo credits to the owner