HARIIN?

Weeween Reyes

10 hrs · 

Hariin?
http://weenweenreyes.blogspot.co

Hariin ka adlaw gi pagto kung hapon
asing nawawagit nailis ay ruyom
asing mga lamok kaling naorasyon
hariiney ka langaw nak maitom-itom?

Ado'y ya naudak ka tubi sa ragat
miski kung kaosa nayamaw sa patag
asing kalibutan kaling ida tawag
nak ingga't amigong pagkahadag-hadag?

Salamat sa adlaw raya'y enerhiya
ato inggagamit sa mga siyensya
ka ato kabuhi rili gi aasa
ka tanan ay dahil sa ida gi buy-a.

Ka ato kuryente, ka krudo nak gamit
kaling ato lana, kaling mga karit
miski mga kotse, kaling ato jeep
tanan ay dahil sa hadag ag init.

Asi rang riiney gi pagto ka buyan
asing kung kaosa'y pay nagyayakaraw
sa ibabaw't langit ay nagpaparadaw
maayo pag suyat, C, D, O ay ayam.

Asing inghuhuyat nak makapauli
iwas nak masapoy kag adlaw nak hari
pag ra nakaliwas ling osa'y nahili
rungan ra sa ida kaling mapipisli.

Nunot ka bituon pati bulalakaw
ragipon ra sinra ag mag sadaw-sadaw
pay ka aninipot pag nayuaw-yuaw
nag-iidlap- idlap ruto sa ibabaw.

Lio pating rampug pay bulak nak sabak
pagkagunda kali sa langit nagkalat
Indi yang mag-uyan mapagto sa ragat
kag tubing yinuha ay asing nag-alat.

Pagkaayo gani ka ato Dios Ama
karamong milagro nak katitingaya
pagtuyog sa gab-i makapahuway ra
pagbati sa aga silak ay naguya.

Kaling kalibutan ramo kang mamasran
kita'y yag tatambling miski nagpapanaw
ling ganing grabidad, kali'y ato ayam
aba'y pagkaboot, kita'y nahawiran.

Kada kita'y pati sa at ingrakuan
ingga't Makaako sa ato'y nagtratar
nak hali'y kalasa kung kita'y mag -istar
indi yang gi limtan kabuhi ay huyam

Kada tan-a kita'y mag-ado nak tawo
ag kag ato yawas alaga't maado
buko kahuhuda kung ato itao
pabalik sa ida pag kita'y nag abo.