Ang mundong Pangarap
(Ekphrastic poem)
Ang nais kong mundo kay timyas at timik
kayakap ay tuwa, ngisngis at hagikhik
pandong ay unawa, sa aral ay hitik
walang panimbuso ni paghihimagsik.
Ang nais kong mundo muslak ang palibot
malamyos ang akbay ngiti'y suot-suot
haplos ay malambing isip ay di takot
magiliw ang bati sa puso'y nunoot
Sa bago kung mundo ang galit, ang hapis,
ay walang espasyo, kahit ang hinagpis,
ang bagong daigdig na sakdal ng tamis
na aking pangarap, na aking ninais.
Ito ang ibig ko, mundo ng pag-ibig
payapa, may langit, pantasyang daigdig!
Weeween Reyes 2019
No comments:
Post a Comment