SA KATAHIMIKAN NG DAGAT

SA KATAHIMIKAN NG DAGAT
www.weenweenreyes.blogspot.com
Ma. Crozalle Reyes Raymundo
a.k.a. Wee-ween Reyes, 3/16/2012

Ah nakakabingi na katahimikan
Tingnan iyang dagat ang alon pagmasdan
Hindi umaalis hindi lumilisan
Walang pumupunta dun sa karagatan

Kay banayad naman iyang kanyang alon
Parang sumasayaw kung saan naroon
Hindi nagmadali at parang umayon
Tahimik na buhay hanggang dapithapon

Ngunit iyang dagat pag siya'y nagalit
Kaytaas ng hampas alon ay makulit
At sa bawat talsik ay lumalagitnit
Ang bawat daanan tamaan ng ngitngit

Ganyan din ang buhay minsan kaytahimik
Lahat ay maayos wala iyang tinik
Pamilya'y kasama wala ang himagsik
Gabay ng magulang buti ang nahasik

Pagmasdan ang buhay ng nangibangbayan
Pamilya'y naiwan lahat naguluhan
Nawala ang sigla lungkot ang nanahan
Nawalan ng giya yaong kabataan

Sa nangibangbayan inyong subaybayan
Kahit sa malayo pamilya'y gabayan
Mga kabataan sadyang kailangan
Ang mga magulang na masasandigan

At sa bawat unos ay maging matatag
At gaya ng dagat hayaang mahayag
Minsan iyang dusa ay nakakadagdag
Upang tumibay pa at buhay panatag —