BUSOG SA PANGARAL

Busog sa pangaral
http://weenweenreyes.blogspot.com/

Tigmak sa luha ang inang
patuloy ngumunguyngoy,
sa bukas na durungawan.
Wala na ni anino ng anak
na hatid nang tingin
hanggang makalayo, ngunit
di maampat ang mga butil
na naghabulan sa kanyang pisngi.
Idagdag pa ang sumabay
na pagtulo ng ilong,
pwede nang pigaan ang damit na basa
nang naghalong luha't sipon.
Habang kumakaway sa hangin
umuusal ng panalangin.
"Pagpalain ka nawa."
Ibig sumabog ng kanyang dibdib.
Nag-aalalang may takot
na gumapang sa isip,
Unang pagkakataong mawalay
ang kanyang nag-iisang anak,
ngunit saglit pa't
ang mga pangamba'y nahalinhan
nang pagngiti at pag-asa..
Dagli'y nagbalik-tanaw
kung paano hinubog ang supling
mula pa nang ito'y magkaisip.
Oo nga pala,
ang kanyang anak ay pinalaking
may pangarap na ibig abutin,
mabait, masunurin, palaaral,
may pagmamahal sa Diyos,
may galang sa magulang
may pagpapahalaga sa sarili
at may kahihiyan.
Pinahid nya ang hilam na mga mata.
Alam nya sa pagtawid sa buhay
anuman ang mapagdaanan,
ito'y sintibay ng nakatanghod
na mga bato sa ilog
hampasin man ng rumaragasang tubig
hindi maaanod..

Weeween Reyes
Photo credits to the owner

Tahan Na

Tahan Na!
http://weenweenreyes.blogspot.com/

Hindi ka ba nagsasawa?
Ako ang naaawa. 
Buhay nati'y maikli na.
Ngunit ang laman ng dibdib mo'y
puro giyera.
Giyerang wala ka naman kinalaman.
Giyerang sa araw-araw na pagmulat
ay iyong inaalmusal,
tinatanghaliaan,
hinahapunan
at kapag di ka nakontento,
minimeryenda mo pa nga.
Nag-aalala ako
baka kahit sa yong pagtulog
laman din ng iyong panaginip
ang walang katapusang poot,
galit sa mga usaping pilit mong
sinisiksik ang iyong sarili
samantalang mas masarap pa
ang magising at matulog ng mahimbing
upang sa pagmulat ng dalawang
maliit na bolang nakadikit sa iyong mukha
maaliwalas na mundo
ang iyong malilikha.
Tahan na.
Patahanin mo na ang dibdib mong
puno ng inis at pagkutya sa mga taong
ni minsan di ka naman binibigyang pansin.
Sapagkat isa ka lang ...
nunal sa kanilang paningin!

Weeween Reyes
photo credits to the owner

Minsan Ang Pag-ibig

MInsan ang Pag-ibig

Ang init ng araw 
na kusang nagpumilit pumasok
Sa siwang ng puyat
na bintanang tanging saksi 
sa kanyang paghihinagpis 
ang s'yang gumising 
sa kanyang kahibangang 
dulot ng isang kasawiang
kaytagal nyang kinimkim
ang dalang pasakit.
Pinili nyang umiwas sa
sa mga elementong.mapanglait, ,
mapanghusga at hindi nakauunawa
sa nagdurugong damdamin
upang sa minsang pagmulat 
kaylakas na halakhak 
ang tahimik na maririnig sa dibdib.
Tunay ngang ang pag-ibig 
ay tulad ng isang alamat,
may maganda at pangit na pamagat

Weeween Reyes 2019
Photo credits to the owner

SINO ANG BANAL?

Sino Ang Banal?

Nagmistulang dagat, inasahang milyon
Ang pagdaloy nitong sagradong translasyon
Laksang mga tao, may banal may hudlum
Bata't matatanda, bakla't mga tomboy.

O, kahanga-hanga't walang kasintibay!
Paa'y di sumuko sa init at ulan
Tila karagatan nang araw pumanaw
Pamandong ay hamog, kayakap ay ginaw.

Walang kasinsidhi, tiyan ma'y dumaing
Ang ibig at nais panata'y tuparin
Patuloy ang layon at mga hangarin
Pagmamahal sa Dyos, sigaw ng damdamin.

Hangad ko'y matulad sa namamanata
Ngunit nangangambang alon rumagasa
Paimbabaw kayang aking paniwala
O dapat ayunan ang isang pithaya?

Bawat isinilang o bawat nilalang
sa mundo ng tao lahat pantay-pantay
Kung mali't di tama anong pamantayan
Sino ang huhusga? Ikaw ba ang banal?

Weeween reyes 2019
Photo credits to the owner

BASA-BASA DIN KAHIT WALANG TAYM...

Basa basa din kahit walang taym...

Muli'y sasara ang tabing ng dumaang taon gaya ng mga nauna. May masasakit na alaala may masasaya. May kinapulutan ng pag-asa, may nakapanlinlang. Mayroong nagbigay ligaya, mayroong pagdurusa. May inggitan, may pagbibigayan. May poot, may pagpapatawad, may nagbingi-bingihan, may nagbulag-bulagan.

Nawa sa pagtatapos ng huling pahina ng kalendaryo, sa pagpilas nito'y kasamang mapupunit ang mga bahaging nagbigay pait, hapdi at pighati sa ating buhay. Nawa'y tuluyang mapigtal ang mga siphayo, pasakit at pagluha, upang sa pagsalubong sa haharaping taon ang mga panimdim, hapis, at hinagpis ay tuluyang malilibing kasama ang kanser ng kahapon na naglugmok at nagpahirap sa mahihinang kaluluwa o kung hindi man, ang mga ito'y magsilbing aral.

Sana sa taong ito at sa mga susunod pa ay iwasan nating makapanakit ng ating kapwa, maging ito'y emosyon o pisikal. Sana'y matuto tayong magmahal, gumalang magpakumbaba, magpakatao at makisama sa bawat nilalang ng Diyos mahirap man ito o mayaman at iwasang makadagdag sa kaguluhan ng mundo, manira, manulsol, gumawa ng kwento at maging sanhi ng di pagkakaintindihan.

Sana'y wag tayong malunod sa taginting ng pera at kislap ng salapi, mapagkamkam sa di mo tunay na pag-aari, dahil ang mga kayamanan at materyal na bagay ang magpapabigat sa ating paglisan sa daigdig lalo't ito'y bunga nang kagahamanan at kapalaluan.

Sana'y matuto tayong magdilig ng ating mga kaluluwa nang sa gayon ito ay yumabong upang sa oras nang paghuhukom ang pintuan ng kaharian ay bubukas at tayo'y malugod na papapasukin sa kanyang tahanan pagdating ng tamang panahon at may mukha tayong ihaharap sa Kanya.

Lagi nating alalahanin, kahit gaano tayo kaganda at kagwapo, kakinis at kabata, hindi tayo mga imortal. Sa pagdaraan ng mga taon unti-unting binabawi ang lahat ng ito at walang matitira kundi ang ating kulubot na balat, sakit at katandaan na magpapahiwatig na tayo'y walang kontrol at karapatan sa ating buhay at unti-unti'y babawiin ang lahat sa atin at ang ating katawang-lupa ay magiging abo. Ang kaluluwa natin ang magsasakripisyo kapag tayo'y di natuto, sapagkat mayroong hangganan ang buhay ng tao sa mundo.

Weeween reyes
Larawan: kredito sa may-ari

UNANG PASKONG WALA KA INAY

Unang Paskong Wala Ka Inay

Sana'y kulay puti ang kulay ng Pasko
Katulad nang dating bulinggit pa ako
Mandi'y tuwang-tuwa sa pamaskong piso
Mata'y nagniningning, puso'y lumulukso.

Ngunit paano na ang Paskong darating
Hungkag ang paligid sinlungkot ng silim
Luksa ang tawanang dati'y kay taginting
Hikbi ang kapalit, wasak na damdamin.

Ang Paskong darating wari'y kulay asul
Awiting kaylungkot tila nanunulsol
Nag-unahang butil sa pisngi'y dumaloy
Sakbibi ang hapis, luha'y nanghahamon.

Habang minamasdan tangang telepono
Titig ko'y napako sa mga numero
Ibig ko'y marinig, tinig mo'y hanap ko
taynga'y hinihintay tunog ng boses mo

Paano ang Pasko kung wala ka Inay?
Bawat ngiti'y hilaw, halakhak ay bahaw.
Paano ang Pasko kung may pagdaramdam?
Ang keso de bola, hamon ba'y linamnam?

Sa aming paglakbay salita mo'y gabay
Ang ginintuang aral na iyong iniwan
Bawat titik nito'y pahahalagahan
Isang kayamanang walang makanakaw.

Dangat kapaskuhan ay kapanganakan

Nang ating mesiyas, ang Diyos na banal

Tayo ay magdiwang,at pasalamatan

Ang buhay na hiram mayroong hangganan

Weeween Reyes 2018

UNANG PASKO SA LANGIT

Unang Pasko Sa Langit

Tanaw ko'y gumala't abot kalangitan
Nagbakasakaling kita'y mamataan
Sa mga bituing baka isa'y ikaw
Sinag ng liwanag, ilaw mo ay tanglaw.

Kumikislap ka bang tuldok sa madilim?
Sa rabaw ng mundo ay bibitin-bitin
Habang nakatanghod ngayo'y nakatingin
Sukdang minamahal lubos naninimdim.

Ngunit hayaan mo ang mga naiwan
Sa tamang panahon ikaw'y sasamahan
Ta'y may kasabihang "una-una lang yan"
Buhay sa daigdig sadyang hiram lamang

Paano ba Inay ang Pasko sa langit?
kwentuhan mo ako habang nanaginip
Sinalubong ka ba ni Itay ng halik
si Kaka, si Diko, mukha ba'y nanabik?

Siguro nga Inay masaya ang Pasko
Na una mong danas mula nang yumao
Sa piling ng Diyos at Ama ng tao
Namnamin mo Inay kaygandang regalo

Sa piling ng Ama ang Pasko ay wagas
Lahat ay masaya, may pumapalakpak
Sila'y sumasayaw habang magkayakap
Kumakanta-kanta anghel na may pakpak.


Inspirasyon:
Flor Maliwanag Keh: Merry Christmas, 
1st time dn ni auntie to spend Christmas 
in heaven with Jesus Christ.

Weeween 2018