PAUWI KA NA

Pauwi Ka Na

Sa piling mo Inay may tamis ang lambing
Sa sinapupunang kami ay nanggaling
Ang yong mga yakap, init sa yong piling,
Hagod ng pag-ibig kanta ay lalarin.

Pumikit na Inay, himbingan ang tulog
Ngiti ay baunin saan man umabot
Ang wagas na buhay sa piling ng Diyos
Ay kapayapaan ang tunay na handog

Humayo ka Inay patungo kay Itay
Upang maidugtong kwerdas na napigtal
Sa aming pighati lagi ay tunghayan
Upang kalungkutan namin ay maparam.

Paalam na Inay, masayang paglakbay
Sa Kanyang kandungan ang tunay mong bahay.

Weeween Reyes 
"Undas 2018"

Good Night Sweet Dreams Inay

"Goodnight, Sweet Dreams Inay"
Matulog ka Inay
nang walang kasinghimbing.
Kapag ikaw'y naidlip 
di kita pupukawin.
Matulog kang tahimik
at mata mo'y ipikit
Upang bawat kirot
di na mapapansin.
Lulubayan ka na
ng mga hinagpis.
Tuluyang mababaon
agam-agam at hapis.
Inay, baunin mo aming pagmamahal
na tanging sa yo'y aming maiaalay
at yayakapin ka ng aming mga dasal
upang sa palisan iyong maging gabay.
Kung kami ma'y nagkulang
Hiling sa yo'y kapatawaran.
Di man namin naisin
oras ay nakatali rin.
Sa yong paglalayag
hahawiin ang makapal na ulap
ng mga anghel na sasalubong,
naghihintay sa iyong pag-akyat,
pagkat tandaan mo Inay,
nabayaran mo na sa lupa
ang mga kasalanang
lingid at di natin alam.
At sa yong pagdatal
ikaw'y pagbubuksan
sa tahanang langit na tunay
Pagkat napatawad ka nang ganap
sa pagluwal ng sampung anak.
Mapayapang paglalakbay Inay!
Ikumusta mo na lang kami
Sa aming amang mahal,
at sa dalawa naming kuyang
una nang namaalam.
Paalam Inay, paalam.
Hanggang sa muli.
Wee-ween Reyes
Oct 12, 2018
(9th day)

1h











Comments

Write a comment...

See More Recent Stories

How Sweet is God

How Sweet Is God

I love looking

at the roof of the world

Where I can see

stratus, cumulus,

and stratocumulus,

the lowest in the atmosphere.

One day

as I was catching the clouds,

I saw a big ice cream in a cone

and at the center,

I saw Him.

At first, I was petrified

but later astonished.

But there was no camera

to capture the sight,

instead, I kept it

in my heart and mind.

I'm sure, He'll give me

the chance to put into canvas

my unique experience

With the clouds and God.

The following days,

blessings did pour!

Wines 2018

ANG KASALAN

Ang kasalan

Ang saya saya ko.
Handa na ang lahat
magmula sa mga abay, flower girl,
kahit na ang ring bearer.
Nakausap na rin ang pari
at ang simbahang gaganapan.
Ang mga ninong at ninang kumpleto na rin.
Ang kanyang magulang at ang akin
ay nagkita-kita ng sila'y mamanhikan.
Ganito pala ang pakiramdam.
Gusto mong umiyak sa kaligayahan.
Maya maya pa'y dinala na ang wedding gown.
Oh kay ganda't mamahalin.
Tingin ko'y bagay na bagay sa akin.
Sayang, di pwedeng isukat,
baka di daw matuloy ang kasal.
Eksayted na akong di ko mawari
Tila baga mundo'y nakikibahagi.
sa lahat ng kaligayahang
natatamo ng isang tulad ko.
Dumating na rin ang mga kaanak.
siksikan na sa aming malaking tahanan.
Nagkakatuwaan na't nagkakasiyahan
Habang ako'y umupo na't mag-aalamusal.
Ang bango ng Luto ni Yaya
Kaysarap ng afritada
at ako'y kumuha na ng kutsara't
sumandok, saba'y nganga,
nang biglang may yumugyog sa aking panga
ano ba, binabangungot ka na naman mama!
Waaaaaaaaa....
Di man lang pinasubo kahit isa :p

MAY BULONG ANG ULAN

May Bulong Ang Ulan
http://weenweenreyes.blogspot.com/

Bumuhos ang kanina pa'y
nagmamatyag na itim na ulap
na nakahalukipkip sa dakong kanluran.

May pagbadya ang lagaslas ng ulan.
May angas ang galaw.
Ang talim ng kidlat
halos pumunit sa pisngi ng langit.
Kahit ang hanging walang imik
Wari'y natulala sa palahaw ng kulog
at sandali pa't napapitlag.
Hudyat upang mag-uwian ang mga batang
nagkakatuwaang magduyan
sa lumang gulong ng sasakyang
binugkos ng pirapirasong tela't
tinali sa ilalim ng malaking
puno ng bayabas.
Takbo!
Kaya't nagtilamsikan ang tubig
na nagsisimulang maipon sa kalsada
sa kanilang pagkaripas.
At ang bawat talsik nito'y
gunitang nagpabalik sa nakaraan,
noong tayo'y inabutan
ng ulan sa madulas na pilapil.
Kaylamig ng bawat butil
na kumakaskas sa aking mukha
at nuot sa aking kalamnan.
Ngunit ang init ng yakap mo'y
darang na tumutunaw sa aking ginaw
at sa bawat sablay ng aking hakbang
sa daang makitid, dibdib mo't
dibdib ko'y agad sumasanib
upang ang paa ko'y di sumawsaw
sa pitak ng bukid.
Hayyyyy....

At ako'y napangiti.
Hindi lang hikbi ang dala ng ulan,
may bulong din itong hatid ay kilig.

Wines 2018

SA LIKOD NG LUMANG LARAWAN

Sa Likod ng Lumang Larawan

Nangangalmot na ang amag
na naninirahan sa kupas na larawang
nasa kahon ng narrang aparador.

May sapyaw na kurot ang kirot
tuwing umaalis ang araw,
ang buwan, at ang taon
sa mga pahina ng kalendaryo.
Lagpas bahay na ang puno ng akasyang
magkasabay tinusok sa lupa
sa laki'y naging lilim na,
ngunit kahit minsan ni haplos
ng basahan, di man lang sumayad
sa napabayaang litratong
hangad lang ay simpleng paglingap.

Minsang s'ya'y umuwi sa sariling bayan,
ang lumang larawan, nakaramdam 
ng pag-asang matagal nang pinapangarap.
"Kahit isang sulyap man lang."
(Gaya ng kanyang pag-asam).

Matamlay na ang kulay nito,
ngunit banaag pa ang saya ng lumipas.
Ang limot na't nilumot na nakaraan.
Dagli'y nahapit sa dibdib. 
May ngiting bumahid sa labi
pagkat alaala'y multong bumabalik.
Danga't kahit sa hinagap,
wala ng puwang ang dating kilig.
Ang pananabik magtatalo lang
at ng isip.

Wines 2018

KAHIT ISANG YAKAP LANG

Kahit Isang Yakap Lang
(Miss kita Ina)

Ibig kong mayakap ang nagbigay buhay
S'yang naging dahilang araw masilayan
Paa'y nasa hukay nang ako'y niluwal
Ang mundo'y tumigil habang nasasaktan

Nang ako'y nagsilang wika ko'y bayad na
Sa mga hirap mo at pag-aalala
Sa halik at hagod na walang kapara
Kulang pa ang sapat, oh, mahal kong ina!

Ngunit paano ba kita matularan?
Yaong pagmamahal na walang kapantay
Sa pag-aaruga't walang sawang gabay
Sa pag-uunawa bawat kamalian.

Kaypalad ko wari na ako'y nagising
sa mundong may hapis ngunit may paglambing
Sa mundong makulay, mata'y walang piring
May hagod ang tulog, madaling mahimbing

Mapalad din sila na ako'y namulat
Sa iyong daigdig na puno ng habag
Upang sa paglakbay o pagtawid-dagat
Baon ay pagsintang may sayang kayakap.

Salamat oh ina at may gintong-aral
Ang nulas sa labi mulang kabataan
May lamyos ang himig, may dangal ang asal
Sa bawat tugtugin, may tamang paghakbang.

Weeween 2018
(Pictures taken a year ago)