Ngumiti ang Langit

Ngumiti ang Langit

Sa lilim ng puting puno
papandungan nito ating mga puso 
upang laging magkayakap, magkasuyo
pag-ibig ay di maglalaho.

Sa ilalim ng puno'y ipagkakasya
itatanim natin ang mga alaala
upang lalong yumabong at dumami pa 
uusbong, bubunga ng higit na saya.

Ugat nito'y ating pahahabain  
ibabaon ng malalim at palalakihin 
at ang pagsinta'y palalawakin
ikaw, ako, tayo, laban ito natin.

Kahit bituin at tala'y naghagikhikan
at nakasilip ang maliit na buwan
sa siwang ng malasutlang ulap, ayan,
nakikinood, nakikiamot sa kaligayahan.

Habang ang panganorin ay nakatanghod
sa tuwa ay naghasik ng hamog
kayat ang puting puno'y kay alindog
nakangiti ang langit, kumakaway ang Diyos!

Weeween 2019
frame: 1 meter x 1 meter

Idea : u tube

purang may langit ka

PURANG, MAY LANGIT KA!

Ang mundo ay puno ng hiwaga't bakit
Nang luha at hikbi, minsa'y hinanakit
May ngiti at tuwa kapag ang nasungkit
May kisap at ningning, bituing marikit.

Ang bawat nilalang niluwal sa mundo
Ay may kanya-kanyang tangang pagkatao
Kung may matalino, may mahinang ulo
Kayumangi't puti, may tisoy may negro.

Ang lahat sa lupa Diyos ang may akda
May sariling dunong, iba't-ibang mukha
May sariling bait mabuti't masama
Binigyan ang tao ng isip at diwa.

Ngunit ang ating Dios lubhang matalino
Mula langgam, lamok at ibang insekto
Ating bawat kara walang kapareho
Anumang itsura tayo'y makuntento.

Pagkat may dahilan ang pagkakaiba
Upang ang daigdig may lungkot, may saya
May ahas, may daga balanse ang dala
Ang ating planeta ay walang kapara.

Tanggapin ang bawat bagay na hinain
Kung anong hinasik siyang aanihin
Manyapa't kinulang huwag lalaitin
At baka ang langit di na ta diringgin.

At ang mapepera kapag naging hangal
Naging palamara sa yamang nakamal
Buti pa ang aba kahit nanunungkal
Kanyang isusubo marumi ay banal.

Biyaya sa taas kagyat nakahanda
Ang isang palasyong dampa lang sa lupa.

Weeween Reyes 2019
Photo: courtesy of Cecille Reyes